أكل وشرب
كارلوس أنيس٣٠ نوفمبر ٢٠١٩
This article is also available in   Switch Language

٥ مطاعم شعبية للمشويات كباب والكفتة في القاهرة

في كل مكان في القاهرة هتلاقي محالات مشويات شعبية أو فخمة، لكن في أماكن للأكيلة، اللي لازم الكباب والكفتة يكونوا بالمسطرة عشان يملى العين، اللي بيقدروا الطعم الأصيل، والأكل اللي يسد مع الواحد وهو واقع من الجوع، هنقولك عليهم.



١. الرفاعي الكبابجي



من علامات حى السيدة ذينب كباب الرفاعي، الناس القديمة تعرفه وتقدره، مكان التاريخ مهدوهش لكن زاده هيبة وحلاوة، اسمه كمان “كبابجي الطاهرة”، قعدة حلوة وأكل طعم، ده ميترحش لوحدك، خد صحابك اللي بيقولوا على نفسهم عتولة في الأكل وجربوه.



٢. كابر صبحي



طبعًا فخامة الاسم تكفي، لو متعرفهوش؛ فده أكبر وأشهر مطعم كباب وكفته ومشويات في القاهرة، الناس بتجيليه بالاسم من كل مكان في العالم، هتلاقى عليه جنسيات مختلفة مصريين على خلايجة على أجانب، لو لسه مجربتهوش فالسيط ده مش من فراغ، روح روض الفرج في شبرا واسأل عليه ألف مين يدلك.



٣. كبابجي فرحات



ليه فروع كتير، بس على الأصل دور، أصله في شارع الأزهر، أشهر مكان بيعمل شوربة حمام قبل الأكل تخليك متدفي ومستنظر كل الأكل اللي جايلك اللي هيدوب في بوقك دوب، ده غير الحمام المحشي اللي بيقدمه اللي مش هتعرف تمسك نفسك من فرط اللذة من طعمته وحلاوته.



٤. الدهان



ليه فروع كتير، لكن أشهرهم فرع الحسين جنب مسجد سيدنا الحسين طوالي، هتلاقى قعدة لطيفة مليانة بريحة القاهرة الفاطمية، وأجواء جميلة وأكل هيجوعك بس من ريحته وهو بيتشوى على الفحم، لازم لما تروح الحسين تجرب تاكل من عنده.



٥. صبحي الحاتي


نفرق بين صبحي كابر، وصبحي الحاتي، عشان مطعم صبحي الحاتي ده بقى في منطقة جسر السويس قرب كوبرى التجنيد، هتلاقي مبني فخم كده من 3 طوابق، التيم بيستقبلك من على الباب بمنتهى الشياكة، الدور الأول استراحة للناس اللي طالبة تيكاوى والدور التاني لو عايز تشرب حاجة أما التالت ده لو هتاكل، انت رايح مكان علامة من علامات الكباب في مصر ليه أكتر من 40 سنة، هتستمع بالأكل فيه.

مقالات ذات صلة