مشاريع
رحمة علي٢٨ نوفمبر ٢٠١٩
This article is also available in   Switch Language

5 أماكن في القاهرة تخرج فيهم مع أطفالك

الأطفال مش أي خروجة بتبسطهم، هما عايزين تنطيط وجري ولعب، يعني المولات والسينمات مش هو أحسن مكان عشان تخرج طفلك، احنا جبنالك أماكن كتير مناسبة للخروج مع أطفالك، عشان أما يعيط أو يصرخ أو يتهبد على الأرض متحسيش أبدا أنك لوحدك، لأن كل اللي حواليك أطفال وأهالي بتراضيهم.



كيدزنيا



يمكن أفضل الأماكن اللي تقدر تخرج فيها مع طفلك، وهينبسط من الجو وهينشغل وكمان هيتعلم.

كيدزنيا مجتمع كبير جامع نموذج محاكاة لمهن كتير، اطفالك هيتعلموا يعني ايه يبقوا دكتور أو صحفي أو سباك.

المكان بيسمح بدخول الأطفال من 4-14، والتذكرة للطفل الواحد مع مرافق تبدأ من 215 جنيه.



بيلي بيز



هي مدينة ملاهي مصغرة للأطفال، تقدروا تسيبوا الاولاد جوا وأنتوا مطمنين عليهم أو تدخلوا معاهم برده، بيلي بيز موجودة في مول العرب في 5 أكتوبر، والتذكرة بتدأ من 100 جنيه.



بيكابو



هو مكان مميز على مساحة مفتوحة، بيضم مكان للأكل والشرب، وملاهي للأطفال، يعني هيبقوا قدام العيون، وكمان تقدروا تنظموا حفلة عيد ميلاد للأطفال هناك.

المكان ليه فرع في المعادي والتجمع الخامس، وسعر التذكرة بيبدأ من 70 جنيه حسب عدد ساعات اللعب.



ماجيك بلانيت



مدينة الملاهي هتلاقيها في أغلب المولات في مصر زي كارفور المعادي وكايرو فيستيفال سيتي، ومول مصر، يعني لو رايحين شوبينج ممكن تدلعوا الأولاد الأول.

ماجيك بلانيت عملين كروت عشان لو بتروحوا كتير، أولها كارت ب1400 جنيه ودا بيبقي عليه عروض ونقاط على معظم الملاهي هناك.

وكمان بيبقي في عروض مختلفة، وتقدروا كمان تعملوا حفلة عيد ميلاد للأطفال هناك.




مسرح القاهرة للعرائس



مسرح القاهرة للعرائس حقيقي مكان جميل بيقدم بشكل دوري عروض ممتعة ومفيدة للأطفال وأكيد هيحبوه، كمان أن أسعاره اقتصادية تبدأ 25 جنيه، وتقدر تحجز قبل العرض بساعة على الأقل.

المكان موجود في العتبة، ممكن توصله كمان بالمترو.



لو روحت أي مكان من اللي فوق سبلينا كومنت بتجربتك، ولو في أماكن بتفسحي أطفالك فيها وبيرجعوا مبسوطين سبيلنا في التعليقات

مقالات ذات صلة