مشاريع
تعرف تنفد بجلدك؟ أماكن لعبة الهروب في القاهرة
انت لوحدك أو مع أصحابك في أوضة مقفولة ومش معاك المفتاح، لكن عندك ألغاز وهنتات hints لو عرفت تحلها هتلاقي المفتاح وتخرج قبل ما الوقت يخلص، وهنا هنقولك أفضل أماكن تلعب فيها لعبة الهروب في القاهرة.
The Room Egypt
ذا رووم في 6 أكتوبر قصاد مول العرب، وعندهم غرفتين الأولى 90s Kid Room والتانية Old Office وفي أي واحدة منهم هيكون عندك ساعة تهرب فيها.
مواعيد شغلهم من 4م لغاية 11.45م ما عدا الجمعة والسبت بيفتحوا الساعة 2ظ والأفضل إنك تتصل تحجز الوقت المناسب ليك قبلها.
Escape Games Cairo
في شارع أبو الفدا في الزمالك هتلاقي اسكيب جيمز مصر ، وهما بيقولوا إنهم أصعب Escape Room في مصر، وإن مفيش حاجة متكررة في الpuzzles والخطوات كلها منطقية والألغاز جدية ومتنوعة.
هتلاقي عندهم اكتر من غرفة منها سجناء الحرب Prisoners of The War اللي كتير من الريفيوهات كان بتشكر فيها. الزمن المتاح للعبة 60 دقيقة والأوضة ممكن تاخد من 2 إلى 7 لاعبين.
Escape Egypt
لو محتاج شوية رعب في حياتك يبقى إسكيب إيجبت في النزهة هي المكان المناسب للعبة الهروب، وهتلاقي عندهم أكتر من غرفة منها السجن والملجأ والمشرحة.
مواعيدهم كل يوم 5م إلى 1ص ويوم الخميس والجمعة بيفتحوا بدري شوية الساعة 2م.
Escape Room Egypt
وفي منطقة هليوبوليس هتلاقي إسكيب رووم إيجبت والغرفة عندهم بتساع من 2 لغاية 6 أشخاص، وبيشتغلوا من 11ص لـ1ص. وغرفتهم المشهورة هي السجن.
Trapped Egypt
في ترابد إيجبت هتلاقي الرعب والألغاز زي باقي أماكن لعبة الهروب، وزيادة عليهم عاملين أوضة مختلفة للبنات اسمها باربي، وقصتها إنها بنت متدلعة ربتها ست عجوزة علمتها إن كل البنات و الستات فوق سن ال١٥ أشرار، و بالتالي باربي قررت بمساعدة الست العجوزة دي إن أي بنت تدخل بيتها هتحبسها و هتعذبها عشان تنتقم من مامتها اللي سابتها لوحدها.
ليهم أكتر من فرع في الشيخ زايد والمهندسين واسكندرية، ومواعيدهم من 3م إلى 1.30ص وتقدر تحجز على موقعهم.
The Maze Egypt
لعبة الهروب دي في التجمع الخامس داخل مول هلا في شارع التسعين، والمختلف عند ذا ميز إنهم مش بس بيقدموا الإثارة والرعب لأ كمان الكوميديا، وده من خلال الأوضة بتاعتهم اللي مسميينها الدوار وواخدة استايل مسلسل الكبير، وعندهم كمان غرفتين هما الأدغال والجراج.
مواعيدهم كل يوم من 4م لغاية 12 نص الليل، ومدة كل أوضة 60 دقيقة للهروب.