4 أفضل الأماكن تجيب منهم ساعة شيك وبسعر معقول

لو بتدور على ساعة حلوة وشيك وفي نفس الوقت سعرها في الحنين، يبقي عليك وعلى وسط البلد، هو بيجمع مجموعة من المحلات اللي فيها ساعات هاي كوبي وهتعيش معاك، بس عشان متلفيش كتير في الشمس جبنالك الخلاصة، وكمان أخر بره وسط البلد لو بتخاف من الزحمة وأنك متلاقيش مكان تركن فيه العربية.

ممر الساعات

هو من أقدم وأعرق الأماكن لصناعة وتقفيلن وصيانة كمان الساعات في القاهرة، المكان عمره أكتر من 55 سنة، المكان في مجموعة كبيرة من المحلات هتلاقي تشكيلة متنوعة، الساعات أغلبها بتبقي هاي كوبي، وممكن تبدأ من 250 جنيه. كل اللي عليك تنزل العتبة واسأل على ممر العتبة، استعد لرحلة شاقة شوية، بس أؤكدلك أنك هتلاقي أحسن من اللي تتمناه.

فتحي إبراهيم

لسه في وسط البلد والمرة دي عند طلعت حرب، وبالتحديد جنب جروبي، فتحي إبراهيم يمكن من أقدم محلات الفضة في مصر، بس اللي متعرفهوش أن عنده تشكيلة ساعات ممتازة، الساعات هناك أوريجنال فهتلاقي الأسعار أعلى شوية من ممر الساعات، يعني ممكن تبدأ من 1000 جنيه، لكن طبعًا دا سعر مقبول جدًا مقارنة بالساعات البرندات دلوقتي ممكن تبدأ من 5 ألاف.

رستن

يمكن أهل مصر الجديدة أكيد عارفين رستن، رستن عنده تشكيلة ساعات هاي كوبي عالمية، وأسعارها معقولة جدًا تبدأ من 300، وكمان بيقدم خدمة صيانة للساعات. رستن موجود في شارع إبراهيم اللقاني في الكوربة، ودا رقم التليفون: 0111 308 3111

ألدو

ممكن كمان تروح ألدو لو مالاقكش في الفرهدة، وهتلاقي لسه السعر معقول مقارنة بالجودة، السعر هيتراوح من 900، وعنده ساعات رائعة حريمي ورجالي، وكمان تقدر تزوره ساعة السيل عشان تستمع بالخصومات. فروع ألدو في مولات كتير في القاهرة زي سيتي ستارز وكايرو فيستفال ومول العرب وصن سيتي.

وأنت قولنا امتي اخر مرة جبت فيها ساعة كانت منين وبكام؟