مشاريع
رحمة علي١١ أكتوبر ٢٠١٩
This article is also available in   Switch Language

٣ أماكن جوا مصر تقضي فيها شهر العسل وتنبسط في الشتا

لو بتفكر تجوز في الشتا وخايف متعرفش تروح في حتة في شهر العسل، عشان الميزانية مش مساعدك تخرج بره مصر، احنا بنقولك متقلقش مصر فيها أماكن جميلة هتعرف تنبسط فيها في الشتا من غير قلق.

سهل حشيش

هي زهرة المدائن، اه والله، وأحسن مكان مناسب للعروسين، هادي ورومانسي وحاجة أخر جمال، سهل حشيش بتبعد حوالي نص ساعة عن الغردقة، بس حاجة كده اخر رواقة، دا غير في الممشى السياحي الفخيم اللي تقدر تتمشى فيه أو تأجر عجل واتومبيل كده رائع، وهتنبسط صدقني، وجوها في الشتا بيبقي دافي وممتع.

لو عايز تدلع نفسك احجز تذكرة ذهاب وعودة في حدود 1500 للفرد، بس على مطار الغردقة، ولو عايز حاجة في الهادي وتروح على سهل حشيش على طول، يبقي احجز في بلو باص والتذكرة رايح جاي في حدود 450 جنيه للفرد.

أما الإقامة في فنادق كتير ومتنوعة من حيث الجودة والسعر، وممكن تبدأ من 5500 ليك ولعروستك.

سوما باي

لسه في الغردقة، والمرة دي هنبعد شوية ونروح لحد سوما باي، وهي بتبعد حوالي ساعة عن الغردقة.

سوما باي مكان جميل برده ومناسب جدًا لشهر العسل، بس للاسف مفيش رحلات لحد هناك على طول، فتقدر تحجز في جو باص أو بلو باص وتروح الغردقة وتنزل تاخد تاكسي، والتذكرة في حدود 500 رايح جاي للفرد.

والإقامة هناك بتدأ من 3500 للفردين بالأكل، الأنشطة اللي هناك كلها غطس وركوب يخوت ومراكب شراعية، بس متنساش تعدي على منطقة الجولف وتعيش عيشة الملوك.

مرسى علم

مرسى علم هي صحيح في آخر بلاد المسلمين بس هي حقيقي رائعة وتستحق العناء، وطبعًا الشتا هو أنسب فترة تزورها فيها، لأن الصيف هتحس نفسك واقف على خط الاستواء.

تقدر تروح طيران والتذكرة في حدود 3500، وتقدر تحجز جو باص رايح جاي في حدود 400 جنيه.

هناك في فنادي متنوعة بس متنساش تعوم مع الدلافين في بحيرة النيزك ووادي الجمال، هناك في مخلوقات بحرية مش هتلاقيها في حتة تانية.

والإقامة في مرسى علم لمدة 4 أيام هتكلفك في حدود 4000 جنيه شاملة الأكل.

لو قضت شهر العسل في الشتا قولنا روحت فين، ولو ناوي تجوز في الشتا قولنا برده ناوي تروح فين؟

مقالات ذات صلة