مشاريع
غصون حجاج٠٥ أكتوبر ٢٠١٩
This article is also available in   Switch Language

أحسن خمس أماكن للتخييم تحت النجوم

البعد عن القاهرة وزحمتها بقى من مطالب الجماهير العريضة، وعشان كده هنتكلم في المقال ده عن أحسن خمس أماكن في مصر ممكن ببساطة تاخد خيمتك وعربيتك أو تركب مواصلاتك وتروح تقعد أنت والبحر والنجوم وبس!

١. وادي الحيتان – الفيوم

بصراحة وادي الحيتان مفهاش بحر بس هي أحسن مكان للتخييم للي عايزين ينجزوا مغامرة عالسريع كده في الويك إند، لأنها أساسا محمية قريبة من القاهرة ومواصلاتها سهلة كمان، فيها حفريات من ملايين السنين تقدر تستمتع بإنك تشوف حاجات جديدة وتقعد تحت النجوم هناك وتجرب الحياة البدائية بتاعة الإنسان الأول الجميلة. وعمومًا لو عايز مية فأنت ممكن تخطف رجلك لبحيرات الفيوم والشلالات قريبة من المحمية مش بعيدة.

٢. قرية شالي – واحة سيوة

سيوة أساسا ملجأ لكل الناس اللي عايزة تفضي دماغها وتبعد بعيد خالص، وقرية شالي بالذات بقى مش محتاج تاخد خيمتك معاك عشان هتلاقي هناك مخيمات صغيرة بتطل على البحيرات اللي هناك بس خلي بالك إن الشبكة هناك مش أد كده وممكن تعملها معاك حبة حلوين يعني فاعمل حسابك وطمن حبايبك قبل ما توصل.

٣. رأس شيطان – نويبع

سافر جوه جمال الطبيعة وروح نويبع طبعا، لأن جمال البحر الأحمر مش بس في منظره وهدوئه، الجمال الحقيقي في المحميات الطبيعية اللي تحت الماية، زي رأس شيطان كده، وفيه هناك كامبات كتير ممكن تحجزها وتسافر على طول فبردو مش محتاج تاخد خيمتك معاك.

٤. محمية أبو جالوم – دهب

للأسف أبو جالوم مبيوصلهاش عربيات وعادة بنكمل الطريق مشي أو جمال أو عن طريق معدية في البحر، بس حقيقي من أجمل الأماكن اللي هتستمتع فيها في البحر الأحمر، وهي بردو مش جوه دهب لكن قريبة منها، فلو هتزور دهب لازم تاخد خيمتك وتروح على هناك تقضيلك ليلة تحت النجوم وبصحبة البحر وبس.

٥. البلو هول – دهب

كهف البلو هول موجود جوه دهب وهو ملاذ المخيمين الأول عشان موقعه المختلف وعشان كونه كهف أساسا فتجربة التخييم هناك ممتعة جدا، غير الشعب المرجانية العظيمة اللي موجودة جوه الماية.

مقالات ذات صلة