مشاريع
رحمة علي٢٩ سبتمبر ٢٠١٩
This article is also available in   Switch Language

لو زهقت من البيت.. 4 أماكن هادية للمذاكرة في القاهرة

“إن شاء الله هبدأ أذاكر بكره”، دي جملة أصيلة لكل طالب مصري، بتحمل الكتير من الأماني أننا هنعمل كل حاجة حلوة إن شاء الله.. “بس مش دلوقتي”، المشكلة أن الجملة دي بتستمر معانا تقريبا العمر كله، “هبدأ دايت من بكره”، “هرجع أقرا تاني بكره”.. وهكذا. عشان نتغلب على الجملة دي، لازم نتدرب من نفسنا أننا نبدأ من النهارده، لا دلوقتي، وبدايتها أننا جمعنالك أماكن جوا القاهرة تقدر تذاكر وتشتغل وتنتج فيها من دلوقتي.



شفشاون Chefchaoun



دا مكان عالمي في الدقي، هيساعدك تذاكر في هدوء، وفي كل المقاومات اللي تقدر تشجعك على الخطوة الصعبة دي، المكان موجود في ش هارون ميدان المساحة، في الدقي. والأسعار هناك زي الفل، يعني ممكن تقضي اليوم كله ب30 جنيه، أو الساعة ب 6 جنيه. المكان كمان في مطبخ تقدر تدخل تعمل فيه النسكافيه المتين، أو سناكس عايز يفوقك، دا غير أنهم بيعملوا ورش لطيفة جدًا كل فترة زي ورش عن الخط العربي، ورصد للنجوم، وحاجات على الرايق.



The Junction Coworking Space



مكان تاني هادي ومثالي للمذاكرة والشغل برده، دا عشان هو موجود في الزمالك، يعني المزاج كله، هتلاقيه في 2 شارع طه حسين، برج إسماعيل محمود.



Booklet



المكان موجود قدام جماعة القاهرة، فوق شاورما الريم، بس هو مكان اقتصادي مناسب فعلا للطلبة الشقاينين، دا عشان ممكن تقعد اليوم كله ب20 جنيه، هما كمان بيقدموا كارت للطلبة لو ناوي تروح هناك كتير، ال6 شهور ب150 جنيه، والسنة كلها ب200، يعني يا بلاش، دا غير أن الاقاعدة هناك تحفة ومزاجها عالي، وهتحببك حقيقي في المذاكرة.



Road9 Coworking Space



المكان المميز دا في المعادي، 90ش 9 المعادي, العمارة اللي فيها سلينترو، هتلاقي فيه انترنت سريع لو محتاجة في شغل –طبعا مش محتاجينه في المذاكرة.. صح ولا إيه!-، وكمان تقدر تطلب أي أكل من حواليك، وهما فاتحين يوميًا من 10 الصبح، إلا الجمعة من 2.



لو ليك أي تجربة في مكان هادي ومناسب للمذاكرة شاركنا بيه.


مقالات ذات صلة