٣ أغاني غناهم عدوية مش بتوعه: بلاي ليست

لما ظهر عدوية في بداية السبعينات، كان انقلاب في عالم المزيكا، مش لانه بس صوت عظيم، لكن لأنه أبن وقته أوي، بيغني للشارع والناس اللي في الشارع بجد بنفس الكلمات والمصطلحات اللي الشارع بيستخدمها، ولو كنت بتشكك في قيمته كفنان كفاية تعرف إن الراجل ده كتبلة ناس زي مأمون الشناوي وصلاح جاهين ولحنله ناس زي سيد مكاوي وبليغ حمدي وفاروق سلامة وهاني شنودة.

عدوية خلق زحمة، زحمة في عالم الغنا لانه كان غزير الإنتاج مقارنة بالفترة اللي استمرت فيها حياته الفنية قبل الغياب الطول، وفي الزحمة دي أعاد عدوية إحياء مواويل شعبية كتير كانت قربت تتنسي، وقدم أغاني لمطربين تانين.

يا بتاع التفاح

خلينا نسخن في البداية بموال شعبي وبيختمه عدوية باغنية ولا يا ولا للمطرب عبدالغني السيد اللي اتغنت سنة 1944 في فيلم شارع محمد علي وكتبها أبو السعود الإبياري ولحنها محمود الشريف

حلو وكداب

بين عدوية وعبدالحليم علاقة غريبة ومعقدة بدأت بجر شكل من عبدالحليم لعدوية لما مسك الطبلة في حفلة وغنى السح الدح امبو وكان عدوية حاضر، فردها عدوية بمهارة لما غني قدام عبد الحليم نار يا حبيبي نار فول بالزيت الحار، وكانت علاقتهم علاقة صداقة ومحبه حسب كلام ناس كتير.

لكن بعد وفاة عبدالحليم وفي لقاء تلفزيوني وبأقل عدد ممكن من الآلات الموسيقية وعلى الهوا وبدون تحضير بيغني عدوية اغنية حلو وكداب اللي كتبها مأمون الشناوي ولحنها محمود الشريف وغناها عبدالحليم في فيلم موعد غرام سنة 1956

يا زايد في الحلاوة

رغم انه صوت شعبي عظيم لكن بخته كان قليل، قليل لدرجة غنه مات مقتول في الشارع والجاني لحد النهاردة مجهول، الكلام هنا على عزت عوض الله، الراجل اللي خلده نجيب محفوظ في روايته ميرامار وخلد معاه اغنيته يا زايد في الحلاوة.

لكن على الرغم من كدة إلا إن الاغنية دي ما اتشهرتش غير لما غناها عدوية بصوته رغم إن قبل منه غناها مطرب شعبي تاني وهو فايد محمد فايد لكن سحر عدوية شهر الاغنية وخلى الناس تدور على صاحبها الأصلي، الأغنية من كلمات أحمد ملوخية (هو اسمه الحقيقي كدة يعني في البطاقة ملوخية) وألحان عزت عوض الله.

الهدية

علاقة سيد مكاوي بأحمد عدوية كانت علاقة مميزة من الصحوبية والمحبة، خصوصا إن سيد مكاوي لحن لعدوية اكتر من مرة منهم اغنية سيب وانا سيب، لكن في قعدة خاصة اتسجلت اغنية ليلة امبارح ماجنيش نوم اللي كتبها صلاح جاهين ولحنها وغناها سيد مكاوي، لكن في التسجيل ده ها تسمع صوت نادية مصطفى واحمد عدوية ونجاح الموجي التلاتة بيغنوا ليلة امبارح ماجنيش نوم.