مشاريع
غصون حجاج١٦ سبتمبر ٢٠١٩
This article is also available in   Switch Language

أحلى أربع مطاعم للأكل الآسيوي في القاهرة

ناس كتير بتحصر منطقة شرق آسيا كلها في السوشي وبس! على الرغم إن فيه أكلات كتير لازم تجربها غيره زي الفراخ اللي باللمون أو بالبرتقان مع شوية نودلز مقلية بقى بالخضار وتبقى الأكلة كملت، هما عموما عشاق للأكل المسكر مع الحادق فلو ليك فيه لازم تزور مطعم من دول:

١. Dragon House

مطعم دراجون هاوس أحسن حاجة فيه التنوع لأنك هتلاقي فيه أكلات كتير من دول شرق آسيا زي المطبخ التايلاندي المليان بأكل جديد ومختلف أحسن حاجة عنده هو طبق الفراخ بالبرتقان هي شكلها زي الزلابيا بصراحة بس طعمها عظيم، وديكور المكان كمان وهمي ينفع جدا لديت فانسي كده جميل، المكان هتلاقيه في شارع 9 في المعادي وقريب جدا من محطة ثكنات المعادي.

٢. Joy Luck

لو عايز تقضيها النهاردة صيني فعلا وتاكل الأطباق الشعبية بتاعة الصين يبقى عليك وعالمكان ده، هو المكان تحسه ضيق شوية كده ومش واجهة بس أسعاره مهاودة يعني هتخليك تيجي تقضيها صيني مرة أو مرتين في الأسبوع مثلا والميزانية مش هتخرم منك، والنودلز المقلية أحلى حاجة عنده لأنه بيظبطها جدا.
المكان في شارع 233 دجلة المعادي.

٣. Mr. Wan

كونك فيجيتريان ده يخليك بردو تخرج وتتمتع بالأكل عموما والآسيوي كمان لأنهم في مستر وان تحديدا بيقدروا الناس الفيجيتريان جدا، هتلاقي هناك أطباق للفيجيتريان كتير تقدر تطلبها ده غير كمان إن أسعار المكان مش غالية وديكوره بسيط، المكان قدام الحديقة الدولية في مدينة نصر.

٤. لازياتيك – L’Asiatique

كل شوية كده بنبقى محتاجين مطعم نتدلع فيه شوية، فما بالك بقى هتدلع بالصيني كمان؟ عندك لازياتك الديكور بتاعه رسمي كده وينفع لعشا عمل أو لفيرست ديت عظيم، ده غير الأكل بقى دلع تاني وطبعا منيو المطعم ميخلاش من السوشي والقطع اللي عاملها لازياتيك مخصوص لرواده.
لازياتيك موجود في شارع سرايا الجزيرة بالزمالك.

مقالات ذات صلة