أكل وشرب
غصون حجاج١٤ سبتمبر ٢٠١٩
This article is also available in   Switch Language

خمس أكلات في القاهرة لازم تجربهم

القاهرة مليانة بالأكل الحلو، بس احنا هنا هنقولك على أجمد خمس أكلات مينفعش تعدي عالقاهرة كده من غير ما تجربهم.



1- حواوشي من الرفاعي




أنت هتروح عند محطة محمد نجيب عند قصر عابدين كده، هتسأل فين الرفاعي؟ بس هتلاقي نفسك قدام محل صغير كده بيعمل حواوشي بس، تحس إن الراجل مؤمن بالتخصص، لأ والحواوشي بنكهات مختلفة كمان يعني فيه حواوشي بالخضار بس أجمدهم الحواوشي اللي بالجبنة حاجة عظمة. وطبعا بيقدم السمبوسك والممبار والذي منه كمقبلات جنب الحواوشي.




2- كوارع الركيب



خلينا متفقين إن الكوارع أكلة جامدة متتاكلش عند أي حد، وكمان لازم تكون ضامن نضافتها، عشان كده مفيش أحلى ولا أطعم مكان تاكل فيه كوارع غير الركيب في السيدة، ومن كتر مهو مشهور على الرغم من إنه محل صغير بس لو نزلت أي حتة في السيدة وسألتهم فين الركيب هيقولولك أهو. قريب من مسجد السيدة زينب لأنه يعتبر في الميدان نفسه.




3- بيتزا السلطان



كنا زمان بناكل البيتزا الشرقي دي في المصايف، بس واحدة واحدة ابتدت تغزو القاهرة، السلطان هو فعلا سلطان البيتزا في مدينة نصر لأنه ملوش حل بيعمل بيتزا شرقي وإيطالي وفطاير ومشلتت كمان، والحلو عنده مش هيخليك تقوم من مكانك حرفيا، فأنت خليك متأكد إنك قبل تجربة السلطان حاجة وبعد التجربة هتبقى حاجة مختلفة خالص!




4- كشري سيد حنفي


وسط البلد في الكشري متعرفش ياما ارحميني، فيها حيتان الكشري زي سيد حنفي وأبو طارق وكلهم كانوا عصاميين وبدأوا بعربية في الشارع، بس أنا دايما بميل للكفة الأولانية، لأن كشري سيد حنفي له مذاق خاص كده، وهي دايما أكلة كل زهقان ماشي بلا هدف في وسط البلد.



5- كبدة وسجق على بركة الله!


لأ هي اسم العربية “على بركة الله” أشهرعربية كبدة وسجق في رمسيس، يمكن الراجل ده شهرته أكبر من محمد رمضان، ساندوتش الكبدة اللي بالطحينة ده عمرك ما هتنساه لما تدوقه وهتفضل تسأل بعد ما تخلص الربعمية سندوتش هو الراجل ده عامل ايه مختلف يعني في الكبدة عشان يطلع طعمها كده؟


مقالات ذات صلة