مدونة
رحمة علي١٢ سبتمبر ٢٠١٩
This article is also available in   Switch Language

بعد قرار ‘عجلة لكل مواطن’.. 4 أماكن في القاهرة لتعليم العجل

مؤخرًا الحكومة أعلنت تبني مبادرة “دراجة لكل مواطن” لتشجيع المصريين لممارسة نشاط بدني وصحي بشكل أكبر، ومن ناحية تانية، للتقليل من الاعتماد على المواصلات اللي الملوثة للبيئة وأكيد برده لتوفير استهلاك الطاقة. البنزين أسعاره في الطالع، يعني مبادرة زي دي هتوفر عليك كتير، واحنا في “القاهرة” جمعنالك احسن الأماكن اللي هتساعدك تتعلم ركوب العجلة، عشان مش عايزين حوادث.



Go Bike



من أهم وأشهر المبادرات المصرية لتنظيم ايفينات جماعية لركوب العجل، وهدفهم هو نشر ثقافة الاعتماد على العجل كوسيلة مواصلات، يعني لو مشوارك ينفع يتراح بالعجلة، متترددش وخد عجلتك وانطلق. Go Bike كمان عندهم مدرسة لتعليم ركوب العجل، هو حقيقي مشروع يشرف ودا لينك صفحتهم على الفيس بوك، عشان لو عايز تشارك في أي ايفينت معاهم، أو حتى تتعلم ركوب العجل.



Bike Zone Egypt



الجميل في Bike Zone Egyptأنهم بيوفرولك كلاس برايفيت عشان تتعلم فيه العجل براحتك، ويكون الوقت كله مخصص ليك، يعني فخلال يومين هتقدر تأخد عجلتك وتطير. المدرسة موجودة في مصر الجديدة والمعادي، وعشان تتابع معاهم مع بداية كل كورس جبنالك صفحتهم لحد عندك، يعني مالكش حجة.



Be cyclist



مشروع أخرى عظيم يستحق الإشادة، وهو مدرسة هتخليك سواق عجل حريف لأي نوع عجل، لأنها بتعلم نظريًا وعمليًا أزاي تقدر تحافظ على توازنك على العجلة، وتروح أي مكان ومتقلقيش أبدًا. المدرسة كمان موفرة أماكن كتير للتدريب، فمغطية أجزاء كبيرة من القاهرة، وهي: مصر الجديدة – التجمع الخامس – الشيراتون – الرحاب – مدينتى.



3agla Pink



لو نفسك بقي تسوقي عجل ومحتاجة تشجيع مع بنات رائعين زيك، يبقي مكانك في عجلة بينك، هتتطلعوا في جولة بالعجلة بنات بس، يعني جمعي صحابك وروحوا على هناك على طول، ولو مش عارفة لسه إزاي تسوقي العجلة، هما أكيد هيعلموكي.



الحق اتعلم ركوب العجل قبل ما كل صحابك يخرجوا بعجلهم، وأنت اللي هتبقي منبوذ وسطيهم.