حاجات هتخليك لازم تجرب سينما MX4D وتدعي لي

من ساعة ما سنيما فوكس فتحت في مول مصر في 6 أكتوبر، وهي عاملة قلبان، بس القلبان الصراحة كان مصدره سينما MX4D، اللي بعد كده فتحت في التجمع في بوينت 90، والشيخ زايد في أمريكانا بلازا، وبتتوسع في حتت كتير.

إيه المبهر فيها؟

السينما فعلًا تجربة مختلفة جدًا، يمكن تكون غالية شوية، بس حقيقي هي تستحق جداً، ليه دا اللي أنا جاية عشان أقولهلكوا.

تصدق دي بتمطر جوا

لو أنت رايح في عز الصيف محتاج برده تعمل حسابك في جاكيت أو اي شال خفيف كده، لأن جوا في اختلاف مواسم يا معلم، لو الفيلم بيحتوي على مشاهد مطرة بتنزل أو في البحر مثلا، فأنت هتاخد في وشك شوية مطرة حلوين كده، بس هتبقي برده متحمس ومبسوط.

هتطير وأنت اقاعد

تكملة للشتا اللي بيدخل علينا فجأة، هتلاقي وأنت اقاعد في السينما رياح , وأعاصير ونسمة هوا لطيفة كده بتهب عليك في نفس ذات الوقت، يعني لو الفيلم في مشاهد سباقات بقي وكوراث طبيعية يبقي دا لازم تدخله MX4D وأنت مغمض.

إيه الريحة دي

تكملة للأجواء غير العادية داخل سينما MX4D، أنت كمان هتشم روايح تقريبا للمشاهد اللي في الفيلم، يعني لو المشهد بيدور في حديقة أو غابة، هتشم ريحة زرع كده خفيفة، دا لو الفيلم فيه مشهد في “زبالة” مثلا، هتشم ريحة مش ظريفة كده بس هتكون على خفيف برده.

شقلبظات على الكرسي

المهم بقي في دا كله، الحركة والرزع والتنطيط، وحبة شمال وحبة يمين، اللي هتحصلك على الكرسي، وشوية تخبيط في ضهرك، بص هو أنت كأنك في الملاهي حقيقي.

يعني مثلًا، الفيلم هو في خناقة بين اتنين، هتحس فعلا “أن ما ينوب المخلص إلا تقطيع هدومه”، وأنت ساعتها هتقوم بدور المخلص، هتتضرب معاهم وهتتشقلب معاهم، يعني ضحك للصبح.

عشان كده بلاش تأخد معاك مشروبات سخنة، عشان تقريبا هيقع عليك، ولو معاك فشار حاول تتبت فيه بإيدك وسنانك، عشان مينتهيش بيه المطاف واقع على الأرض.

الأفلام بتقنية MX4D هتلاقيها متوفرة بأسعار تبدأ من 180 ولو بتفضل الحفلات الليلة، ويفضل أنك تحجز أون لاين قبل ما تروح من على الرابط خصوصًا في الويك أند، عشان تلاقي مكان كويس وتبقي اقاعد مبسوط، أو لو عايز تجرب سينما فوكس في مول مصر يبقي تحجز من هنا – احجز دلوقتي وعيش تجربة عظيمة ومتنساش تدعي لي.