مشاريع
غصون حجاج١٠ سبتمبر ٢٠١٩
This article is also available in   Switch Language

أربع أماكن هتلعب فيهم براحتك!

اللعب يحب دايما المزاج والروقان، عشان كده أي مكان فيه لعب كتير بس فرهدة وزحمة مبيبقاش ممتع، بس “This is Cairo” جمعولك أكتر أربع أماكن رايقين في القاهرة ممكن تاخد صحابك أو عيلتك وتنزلوا عالأماكن دي تلعبوا لحد ما تشبعوا لعب.



1- أدرينالين بارك:



الأكشن مستنيك في أدرينالين بارك، عشان أول ما تخش هيسلموك لبس الحرب والأسلحة وتحاربوا ولا كأنك جوه اللعبة نفسها، وممكن تلعب حروب حقيقية بالليزر أو المسدسات جوه البارك نفسه عشان مليان مخابيء ده غير ألعاب الماية اللي بتخليها مناسبة كمان للأطفال.
البارك هتخشها ب 150ج للفرد بس وموجودة في منطقة الحزام الأخضر، الشيخ زايد.



2- دير سمعان:



ده فعلا بقى أروق مكان ممكن تلعب فيه لأنه جوه جبل المقطم، هو دير عادي بس فيه جزء ترفيهي وكل الألعاب اللي ممكن تتلعب عالجبال زي التسلق والألعاب الخاصة بالحبال، وزيب لاين وكل لعبة ليها تمنها بس هتنبسطوا جدا وأنتو بتنطوا من فوق الجبل هناك.



3- الكامبو إيجيبت:



الكامبو بقى مشهور بالكياك، وهي لعبة تأديف المركب الصغير ده هتستمعوا بيها جدا ودخلوا جديد لعبة العجلة المائية، يعني هتمشي عالماية بالعجلة من غير لا سندات ولا محتاج لتوازن العجلة الحقيقية. المكان مناسب للأطفال عشان فيه كيدز إريا، وهتقضوا يوم لطيف مليان بالشوي عشان هناك هتلاقي شوايات كتير يعني تجيب لحمتك وفراخك وتشوي براحتك عالنيل. الكامبو إيجيبت قريب جدا من محطة المنيب دقيقتين من معدية المنيل اللي في المعادي قدام مدخل أبو النمرس.




4- دراجون أيلاند بارك:



ولأننا عارفين إن بتوع المعادي مبيخرجوش منها، فاحنا جبنالكوا مكان في المعادي شعاره إن اللعب مش بس للصغيرين، لأنك هتلاقي هناك ترامبولين وزيبلاين وكل الألعاب اللي هتخرج فيها طاقتك ويبقى يوم ميتنسيش سواء مع عيلتك أو صحابك. هتلاقي المكان في ميدان فيكتوريا، دجلة المعادي.

مقالات ذات صلة