الصيف بيخلص ومفيش وقت تسافر.. ٥ أماكن تقضي فيهم داي يوز وتفصل

كل اللي حواليك سافروا ومفضليش غيرك أنت والمروحة، عامل تتفرج على صور الانستجرام، احنا حاسين بيك، وجمعنالك أفضل 5 أماكن تقضي فيهم داي يوز بره وجوا القاهرة والتكلفة متخافش على قد الأيد، والحق خد سيلفي على البحر مع هاشتج #summer-vibes ومتخليش نفسك في حاجة.

1. منتجع نايل براديس

المكان دا اختيارك المثالي لو بدور على فصلان حقيقي من غير ما تحرق بنزين كتير وتسافر برا القاهرة، هو موجود في المنيل في جزيرة وسط النيل، وفي هناك حمامات سباحة وعروض استعراضية لطيفة تناسب الأطفال.

تكلفة الفرد بتتراوح من 400-700 شاملة الفطار والغدا، وكمان في أماكن لقضاء الليلة لو حابب تكمل اليوم لأخره.

كلمهم واعرف كل حاجة على الرقم دا: 011 585 826 48 قبل الساعة 5.

2. هيلتون زمالك ريزيدنس القاهرة

لو حابب أكتر تقضي الداي يوز جوا فندق، ففندق هيلتون غني عن التعريف طبعا، وهيكون اختيار موفق، ومكانه في 21 شارع محمد مظهر، في الزمالك.

أنت بتستلم الغرفة من الساعة 10 لحد الساعة 6، لو هتأخد غرفة عادية يبقي ب800 جنيه، لو عايز تكلف يبقي خد غرفة مع فيو على النيل ب900 جنيه وساعتها ممكن تستخدم الساونا كمان.

ولو عايز تحجز كلمهم على الرقم دا: 0227370055

3. جيت بيتش العين السخنة

أما لو بتفكر تطلع على السخنة، وتبقي التكلفة لسه معقولة، فلازم تفكر في جيت بيتيش، خصوصا لو كانت رحلة صحاب وروقان، الفندق موجود عند الكيلو 19.5، ولو هتقضيه على البحر والبيسين مع وجبة غدا هتبقي التكلفة 250 للفرد، أما لو عايز غرفة، ممكن تضيف 400 جنيه.

روح من أول اليوم على الساعة 10 كده عشان تلحق تقضي اليوم وتنبسط.

اتصل بيهم على الرقم لو عايز تفاصيل زيادة: 0100 010 9961

4. كورال سي بيتش العين السخنة

لسه في العين السخنة، الفندق مناسب للكبلز والعائلات كمان، هو موجود عند الكليو 187، تقدر تقضي اليوم الكامل على البحر أو البيسين مع وجبة غداء بسعر 450، اللي بتبقي في الأغلب اوبن بوفيه لو طالع في مجموعة، ولو معاك أطفال هيبقوا مجانًا.

وتقدر تحجز على الرقم دا: 0120 222 9722

5. فندق سيناواي لاجون اكوا بارك – راس سدر

رأس سدر برده من ضمن الاوبشنات اللي ممكن تفكر فيها لو عايز تقضي داي يوز، عشان هتلاقي فيها فنادق وخدمات ممتازة من غير ما تجرح الميزانية.

الفندق يبعد 140 ك عن مطار القاهرة، وتقدر تستمع بالبحر والبيسين ب350 جنيه، مع وجبة غداء في اوبن بوفيه، هو مناسب للكبلز والعائلات كمان.

كلمهم على الرقم دا عشان تحجز: 0100 737 2978

مينفعش الصيف القاتل دا يعدي من غير ما تأخد غطس وتفرفرش، احجز دلوقتي في الويك اند اللي جاي وافصل شوية.