منين بيودي على فين؟ اعرف أهم الطرق الجديدة في مصر

الطرق الجديدة تتوهك حتى لو حريف طرق، والـ GPS بصراحة ميتثقش فيه! جبنالك أهم الطرق الجديدة عشان متتسوحش وتتحرك براحتك.

١. محور روض الفرج – الضبعة:

لو رايح مرسى مطروح أو الساحل الشمالي فطريق روض الفرج – الضبعة امشيه وانت مغمض.

الطريق ده بيوفر عليك من ساعة لساعتين عشان بيخرجك من زحمة القاهرة بسرعة والتفريعات عليه قليلة. ممكن تمسك طريق الضبعة من أول ميدان الخلفاوي بشبرا مرورا بكورنيش النيل وممكن برضه تمسكه من الدائري الاقليمي واخر الطريق هتلاقي نفسك على طريق اسكندرية – مطروح الساحلي تكمل بقى لمطروح أو تروح ناحية الضبعة والساحل زي ما تحب.

٢. طريق شبرا – بنها الحر:

لو بتحب الجري عالطريق ورايح القليوبية، دقهلية، شرقية، غربية أو حتى اسكندرية فطريق شبرا بنها الحر حل مشاكل كتييير!

الطريق ده بيربط ما بين دائري القاهرة الكبري من عند أم بيومي بشبرا بالدائري الإقليمي في بنها. وبيوفر عليك من ٢٠ ل ٢٥ دقيقة عن طريق اسكندرية الزراعي. وكمان المطبات والتفريعات عليه قليلة والطريق واسع عشان كدة لو بتحب الجري اجري.

٣. طريق شرم الشيخ الجديد:

هتروح من التجمع الخامس لشرم الشيخ في ٤ ساعات بس!

قريب جدا هيتم افتتاح طريق شرم الشيخ الجديد اللي بيربط ما بين القاهرة وشرم الشيخ وبيقتصر المسافة في ٤ ساعات بس بفرق ساعتين عن الطريق القديم. الطريق هيمر بمدن رأس سدر وأبو رديس وطور سيناء لحد مدينة شرم الشيخ، يعني هيسهل عليك أنك تطلع تخطف يومين في شرم وترجع.

لو أنت حريف طريق قولنا الاختصارات بتاعتك في الطرق وبتوفر عليك كتير.