مشاريع
عمرو شاهين٢٨ أغسطس ٢٠١٩
This article is also available in   Switch Language

٤ أماكن لقضاء داي يوز في القاهرة من غير ما تشيل هم المصاريف

مخنوق وحران ومفرهد والحر عامل عمايله معاك، ومش عارف تطلع مصيف أو طلعت وعايز افصل في الويك إند لحد ما الصيف يلم عزاله ويرحل، تعالي هنا ها نقولك على أماكن في القاهرة تقدر تقضي فيها داي يوز من غير ما تشيل هم المصاريف.



قرية العزبة



على طريق سقارة السياحي – شبرا منت وبعد نقطة مرور شبرا منت ها تلاقي قرية العزبة اللي ممكن تقضي فيها داي يوز لطيف تستمع فيه بحمام السباحة وملاعب للأطفال وملاعب للكورة وتركب خيل كمان واختيارات كتير للأكل كل ده في أسعار بتبدأ من ٩٠- ١٨٠ جنية ومن الساعة ١٠ صباحا ل ٨ مساء.


بيوت باي



ب ٢٥٠ جنية في اليوم تقدر تعمل داي يوز لطيف وتقطي وقت ممتع في بيوت باي على طريق الإسكندرية الصحراوي بعد الشيخ زايد بدقايق، هناك تقتدر تستمع بحمامات السباحة والبيتش باجي والبينت بول وفي مسابقات وألعاب مائية، وبالنسبة للأكل فبيوت باي فيها مطبخ فيه أنواع مختلفة من الأكل زي الاكل الشرقي والإيطالي والصيني كمان كل ده ٢٥٠ جنية للكبار والأطفال من سن ٦ ل ١٢ ب ٢٥ جنية.



قرية صدفة باشا



عايز تفصل وتقضي يوم ممتع، ممكن تخطف رجلك لحد قرية صدفة باشا على طريق سقارة السياحي- شبرا منت، وفي القرية ها تستمتع بحمام السباحة طبعا والقعدة البدوي وملاعب الأطفال والبلياردو والبنج بونج والشوتينج والبينت بول وكرة السلة والطايرة والخيل كمان، والمطبخ بتاعهم بيقدم وجبات شرقي وإيطالي وغيرها كل ده ب ١٥٠ جنية للفرد والأطفال من سن ٥ ل ١٠ سنين ب ٧٥ جنية.



الريف العربي للخيول



والمرة دي مش على طريق شبرا منت المرة دي في شبرا منت نفسها، هناك ها تلاقي قرية الريف العربي للخيول اللي ممكن تقضي فيها داي يوز عظمة، فيه حمام السباحة واكوا بارك محندقة كدة وكمان ممكن تركب خيل وتتفرج على الحيوانات اللي في المزرعة وتستمع بالدي جس وفقرات المزمار ورقص الخيول والتنورة والعرايس وكل ده ب ١٠٠ جنية في اليوم.

مقالات ذات صلة