٧ أساطير مش هيفهمها غير المصريين

أساطير وحاجات هنتكلم عنها النهارده واللي مش هيفهمها غير المصريين. يلا من غير مقدمات طويلة نعرف أيه هي الحاجات الغريبة دي..

١. الشبشب المقلوب

النقطة اللي أختلف عليها ناس كتي في هي هل الشبشب المقلوب غلط ولا لأ..وهل هو مصدر لحاجة شر أو وحشة وأننا لازم نقلبه؟ مستني ايه أقلب الشبشب بسرعة!!!

٢. دلق القهوة خير

عادي القهوة ممكن تدلق أو تفور.. ايه الفكرة يعني؟ مش لازم يكون دلق القهوة له علاقة بالخير أو الشر يعني، عادي زي أي حاجة ممكن تتكب أو تقع.

٣. شهقة الملوخية

لو مسمعتش عن أسطور شهقة الملوخية يبقي مفتكش كتير متقلقش…الشهقة دي ببساطة بتتعمل وست البيت بتنزل الثوم مع الكزبرة علي الملوخية وكأن الشهقة دي اللي هتطلع الملوخية حلوة…واللي لو معملتهاش ممكن الملوخية تطلع وحشة؟

٤. أقرصي العروسة في ركبتها

أقرصي في ركبتها عشان تحصليها في جمعتها…يعني لو مقرصتيش صاحبتك مش هتتجوزي…كلها خرافات أتعودنا نقولها من غير ما نفهمها. الموضوع كله قسمة ونصيب..

٥. شويه العصير اللي بيفضل في الكوبايه

هنا بقي هتلاقي نظريات متضاربة علي الخرافة دي. انت لو سبت شويه عصير في كوبايتك وأنت عند الضيوف تلاقيهم يقولك ايه:

” كمل يا أبني الكوبايه، أحنا عندنا بنات عايزة تتجوز”..

وكأن شويه العصير دول هما اللي هيوقفوا حالهم؟؟ في ناس تانية بقي لو شربت الكوباية كلها..يقولوا – في سرهم طبعا – الولد ده بخيل ولا ايه، شرب الكوباية لحد أخر نقطة! طب دلوقتي انتوا حيرتوني.. أشرب الكوباية كلها ولا لأ!

٦. خلص أكلك كله

الأطفال هيفهموا الجملة دي كويس، لأنه أكيد سمعوها كتير…لو مخلصتش طبقك كله، الأكل هيجري وراك يوم القيامة.. والحقيقة أن ماما عايزة تزغطك يا أبني مش أكتر علشان الأكل اللي فضلت تعمله اليوم كله ميترميش..

٧. أبو رجل مسلوخة

ايه الحكمة والهدف من قصص الرعب السخيفة وخصوصا قبل النوم؟ عشان الأطفال يجلهم كوابيس مثلا؟ ولا يفتكروا أن أبو رجل مسلوخة هيطلعلهم من تحت السرير لو عملوا حاجة غلط أو لو مسمعوش كلام بابا وماما.