أكل وشرب
أفضل 5 مطاعم أكل هندي في القاهرة
كل حاجة هندي ليها سحر خاص من أول الدراما لغاية الميثولوجي والحضارة وحتى الأكل الغني بالتوابل والطعم المختلف، فلو انت من عشاق الهند وغموضها وفي نفس الوقت بتحب الأكل الحريف والمتبل كويس يبقى الموضوع ده ليك.
بـ12 فرع في مصر قدر مهراجا Mahraja إنه يسجل اسمه في قائمة أحسن المطاعم الهندية في المحروسة.
المنيو غني جدا من أول العيش التندوري والبوري لغاية الأطباق الرئيسية اللي فيها أطباق مناسبة للنباتيين وكمان أكيلة اللحوم والفراخ، وفي خانة الأكلات البحرية هتلاقي جمبري مسالا وسمك برياني، وفي الحلو هتلاقي كذا صنف منهم أيس كريم جوز الهند وجولاب جامون وده شبه الزلابية بتاعتنا.
مهراني Mahrani واحد من المطاعم اللي بتنقلك للهند أول ما تدخل المطعم، وبتديك تجربة لطيفة إنك تتصور باللبس الهنديـ وليهم 3 فروع في الشيخ زايد والمعادي والتجمع الخامس
المنيو متنوع ومغري بشكل كبير لدرجة إن عندهم 9 أنواع من العيش منها بالثوم وبالنعناع وبالزبدة، وعندهم أصناف كتير من اللحوم والدجاج المشوية بالتنور، منها لحم الغنم.
إنديرا Indira بقى مناسب للناس اللي بتدور على الطعم الهندي المظبوط والأجواء الهندية المبهجة، وبيعملوا مهراجانات بتذكرة موحدة للأكل والفقرات اللي بتشمل الموسيقى والرقص الهندي.
إنديرا مكانه في فندق هوليداي إن سيتي ستارز.
نَواب Nawab ليه فرعين، واحد في المعادي والتاني في الزمالك، ومن أطباقهم المشهورة دجاج مسالا الزبدة، ودجاج فندالو المطبوخ بالتوابل والفلفل الأحمر، ودجاج شاهي كورما المطبوخ مع الجبنة وصلصلة الكاجو واللوز، وكاشميري روجان جوش وده عبارة عن قطع لحم ضاني مطبوخ بصلصة اللبن على طريقة كشمير، وجمبري بونا وده جمبرى مطبوخ بصلصة خاصة من الأعشاب والبهارات والثوم والزنجبيل والكزبرة.
شيفا Shiva في هليوبوليس من المطاعم الهندية الجديدة اللي قدرت تنافس وتثبت وجودها، وعند منيو نباتي من بين أطباقه الصنوبر بالكمون وخضروات بالكاري وخضروات حيدر آباد. وفي منيو اللحوم هتلاقي حاجات كتير بالكاري، لحمة ضاني بالكاري وفراخ بالكاري وسمك بالكاري وجمبري برضو بالكاري.