أنشطة ممعتة للأطفال في شرم الشيخ

قارب القاع الزجاجي

من الأنشطة الممتعة جدا للأطفال في شرم الشيخ هي رحلة المركب اللي له قاع زجاجي، علشان بتكون فرصة حلوة جدا إنهم يتفرجوا على الأسماك والشعاب المرجانية من غير سنوركلنج. السعر يبدأ من 200 جنيه للفرد (للمصريين)، ودايما هيكون أرخص لو حجزت عن طريق الشركة بشكل مباشر مش الفندق.

الغواصة

دي درجة أعلى من المتعة أكتر من المركب، لأن الغواصة بتنزل لعمق حوالي 2 متر تحت سطح البحر، فبتقدر تشوف الأحياء البحرية بشكل أفضل من شبابيك الغواصة. الأسعار بتبدأ من 300 جنيه للفرد (للمصريين) وفي خدمات تانية هتلاقي ناس بيقدموها لكن مش أساسية في الرحلة زي الصور التذكارية.

الملاهي المائية

فنادق كتير في شرم عندها ألعاب أكوا بارك، ودي نقطة مهمة في اختيار الفندق لما يكون عندك أطفال، ولو حجزت فندق مفهوش أكوا بارك علشان تستفيد بمميزات تانية ممكن تقضي يوم في أكوا بارك سيتي أو كليو بارك ودول أكبر ملاهي مائية في شرم.

سوهو سكوير

سوهو سكوير من الأماكن الليلية اللطيفة في شرم الشيخ، وهناك ممكن تستمتع مع أطفالك بعرض النافورة الراقصة، والحفلات على المسرح المكشوف، والتزحلق على الجليد، وسينما 9D.