أكل وشرب
دليلك للأكل الصحي في القاهرة
لو بتعمل دايت أو ماشي على برنامج غذائي معين أو حتى محتاج تاكل أكل صحي علشان تحافظ على صحتك، فالموضوع ده علشانك.. وطبعا الأكل الصحي مش معناه إن كله مسلوق وخضار، لا انت هتلاقي كل ما تشتهي الأنفس! بس لو بتدور على محشي مكانك مش هنا!
إن سيزون
إن سيزون InSeason هو متجر أونلاين بيوفر وجبات صحية مختلفة، وكمان عنده برنامج وجبات لمدة 4 أسابيع مناسب لبناء العضلات وحرق الدهون مقابل 160 جنيه في اليوم.
دايت ديلايت
دايت ديلايت Diet Delight عندهم منيو شامل من سلطة وشوربة لغاية الفراخ واللحمة والبيتزا والمأكولات البحرية. والميزة إنك ممكن تطلب وجباتك أونلاين بالسعرات الحرارية اللي انت عايزها، وفي كذا باكدج يومي وأسبوعي وشهري.
كالوريز
كالوريز Calories من الأماكن اللي بتحسب الوجبات مش بس بالكالوري لكن بنسبة البروتين والكربوهيدرات والدهون في كل وجبة، وهو مطعم في مصر الجديدة وعنده ديلفري. والمنيو بتاعهم هيخليك متحرمش نفسك من حاجة، علشان هتلاقي فيه كل حاجة من العصير لغاية الوجبات الرئيسية.
ليتيوسيت
ليتيوسيت Lettuceat متخصصين في السلطة والشوربة الصحية، وبيعلموها بفن. مكانهم في الزمالك والمعادي ومصر الجديدة، وممكن تطلب منهم يوصلولك سلطة وشوربة لمدة 5 أيام مقابل 500 جنيه.
فِت فود
فِت فود Fit Food عندهم منيو أكل صحي شامل فيه سلطات وشوربة وأطباق رئيسية وسندوتشات وحلو، وكل حاجة مكتوب جنبها الكالوريز بتاعتها علشان لو ماشي على برنامج غذائي تقدر تتابعه، وكمان ممكن تكون وجبتك باختيار نوع بروتين ونوع خضروات ونوع كربوهيدرات. واللطيف كمان إن عندهم منيو نباتي.
سلاديرو
سلاديرو Saladero موجود بفرعين في القاهرة (الزمالك والشروق) وكمان فرعين في اسكندرية (سموحة وجليم) ومن الاسم واضح إنه متخصص في السلطة، لكن كمان عنده عنده سندوتشات ملفوف Wrap وعصائر صحية، وكل صنف هتلاقي الكالوريز بتاعته مكتوبة في المنيو.
الركن الصحي
الركن الصحي Healthy Corner متخصصين في المخبوزات الصحية الخالية من الجلوتين، سواء معمولة من الشعير أو الحبوب الكاملة. مكانهم في شارع الأهرام مصر الجديدة لكن مفيش خدمة توصيل.