مشاريع
مها محمد١٨ يوليو ٢٠١٩
This article is also available in   Switch Language

أهم ٣ أماكن سياحية في القاهرة ممكن تروحها بالمترو

القاهرة…كل مكان فيها له سحره الخاص بيه علي مر العصور. النهارده جولتنا هتكون مختلفة، هنذوق سحر بنكهة مختلفة، نكهة كلها تنوع بداية من العصر الفرعوني مرورا بالقبطي وحتي الأسلامي. المميز كمان في رحلتنا مش بس أماكنها…كمان بتجمعها وسيلة موصلات واحدة…وهي مترو الأنفاق. وبالتحديد الخط الأول (مرج – حلوان).


هنلاقي ٣ محطات قريبين جدا من بعض وهم:


محطة مارجرجس: ودي هنشوف فيها مجمع الأديان

محطة الملك صالح: فيها قلعة صلاح الدين الأيوبي

محطة السادات: هنلاقي المتحف المصري


هتبدأ رحلتنا بعد النزول من محطة مارجرجس هتلاقي الكنيسة المعلقة وبعدها بشوية حصن بابليون لكل اللي ميعرفوش ليه الكينسة المعلقة اتسمت بالأسم ده لأنها أتبنت علي انقاض برجين من الابراج اللي شيدها الرومان وهيتعتبر الكنيسة الوحيدة في مصر اللي من غير قبة بعد الكنيسة بشوية هنلاقي كنائس مهمين جدا وكل كنيسة منهم ليها حكاية طبعا.




كل الأماكن دي متاح أنك تدخلها مجانا…بعد كده بنوصل للمتحف القبطي وده سعر تذكرته رمزية جدا.



أخر جزء في المجمع هو مسجد عمرو بن العاص وهو يعتبر تاني مسجد أتبني في مصر وله مسميات آخري زي (تاج الجوامع -الجامع العتيق).



محطة ماجرجس خلصت لكن جولتنا لسه فيها كتير. المحطة اللي جاية هي…


محطة الملك صالح...هنأخد موصلة صغيرة مدتها ربع ساعة وهتنزل تأخد ميكروباص للسيدة عائشة عشان نوصل للقلعة.



وصلنا بوابة القلعة بالسلامة…بندفع التذكرة علي البوابة ونبدأ الجولة…


من أحلي الحاجات اللي هتلاقيها بالقلعة لما توصل لأعلي قمة في القلعة هتقدر تشوف القاهرة كلها وتأخد صور كمان للذكري ودي بيسموها البانوراما

القلعة بتضم العديد من المساجد والمتاحف.


مسجد محمد علي – مسجد ومدرسة الناصر بن قلاون – مسجد سليمان باشا الخادم – مسجد أحمد كتخدا – متحف المضبوطات الأثرية – متحف الأطفاء – المتحف الحربي – متحف الشرطة – برج الطابية – قصر المجوهرات الخاص بجوهرة هانم آخر زوجات محمد علي.


بعد كده بنوصل لأخر معلم سياحي في جولتنا النهارده هو المتحف المصري. عن طريق محطة السادات هنوصل للمتحف بكل سهلة.



قبل الدخول هيشدك الطراز الفرنسي اللي قايم عليه واجهة المتحف المميزة الجميلة. هنقطع التذكرة وندخل المتحف…المتحف ببساطة مكون من دورين: الدور السفلي موجود فيه الأثار الثقيلة زي التوابيت والجدران المنقوشة. اما الدور العلوي فهنلاقي فيه مجموعة مخطوطات ومومياوات وأواني ترجع للعصر اليوناني.


وبكده تكون جولتنا انتهت…بس لسه القاهرة مليانة كنوز كتير هنتكلم عنها، في مدونات جايه ان شاء الله.