مشاريع
نهى قنديل١٥ يوليو ٢٠١٩
This article is also available in   Switch Language

دليل الصيف فى القاهرة لغير المسافريين

مش كل الناس ليها فى الساحل و مش كله وقته او امكانياته تسمحله يسافر, بس ده مش معناه انك متستمتعش بالصيف؛ جمعنالكم شوية افكار ظريفة للي هيقضي الموسم ده فى القاهرة.

يوم فى فلوكة

بدل الخروجة المعتادة فى كافيه او مطعم على النيل و دفع مبلغ و قدره, احجز فلوكة و قضي اليوم فى وسط النيل مع صحابك اوعيلتك. خدوا اكلكم معاكم , شغلوا الاغاني اللي على مزاجكم , و شوفوا غروب الشمس اللي على الأصله.

محمية وادى دجلة

عاوز تحس انك سافرت من غير ماتسافر؟ مافيش احلى من محمية وادى دجلة تحسسك بكدة. طبيعة خلابة بتبعد دقايق من المعادي, هتنقلك لدنيا تانية. لو ليكم فى المشي و الاستكشاف, التسلق و او حتى ركوب العجل, محمية وادي دجلة هى المكان الأمثل. و للي عايز مود اهدى من غير فرهدة, فالمنطقة مشهورة بحفلات الشوي؛ اكلكم و سمعاتكم معاكم و بس كدة. وايلد جوانابانا بتنظم رحلات لهناك كنير مع عمر سمرة.

سافر..عبر الزمن

لو مش هتقدر تسافر للبحر, ايه رأيك تسافر لزمن تانى خالص؟ استغل الصيف و استكشف القاهرة, من كترالاماكن الأثرية هتحس انك فى مدينة تانية! اقنع صحابك و اختاروا يومين تلاتة ورا بعض تزوروا اماكن مروحتوهاش قبل كدة؛ و متحملوش هم التكلفة, رسوم الدخول للأماكن التراثية رخيصة للمصريين.

منتزهات

القاهرة فيها جناين و منتزهات كتير جداً, منها االقديم و الجديد. من الجناين القديمة اللي اتجددت فى السنين الاخيرة هي جنينة الأسماك , اللي بقت مكان امثل للأيڤينتات العائلية, من بازارات و حفلات و غيرهم. كمان فيه فاميلي بارك فى التجمع , اللي بيعتبر من المنتزهات الجديدة الى حداٍ ما. المكان واسع و متقسم حلو, فيه مكان للعب الأطفال, ده غير الأيڤنتات المختلفة اللي بيستضيفها المكان.

تلج فى الصيف!

احلى مكانين ممكن تزورهم للاستمتاع بالتلج فى القاهرة هما سكي ايچبت فى مول مصر و سنو سيتى فى سيتى ستارز. الأتنين مجهزين على اعلى مستوى و فى نشاطات كتيرة ممكن تعملها غير التزلج.

مقالات ذات صلة