أكل وشرب
أحسن مطاعم بيتزا إيطالي في القاهرة
علشان عشاق البيتزا عارفين إنها مش مجرد عجينة عليها بواقي أكل، لكنها فن إيطالي حقيقي، فمش بيعجبهم أي بيتزا في السوق، خصوصا إن الأمريكاني أو التاتش المصري هتلاقيه مسيطر. إحنا هنا جمعنا أحسن مطاعم بتعمل بيتزا إيطالي زي بتاعة بلدها.. جرب وقولنا رأيك.
Degrees 900
في داون تاون مول في التجمع الخامس عندنا 900 Degrees وهما بيعملوا باستا وبيتزا، وكل أنواع البيتزا عندهم فيها جبنة بارميزان وموتزاريللا، زي بيانكا ودي لحمة وطماطم شيري وصوص طماطم، وبيتزا جندوفلي وفيها جندوفلي وكريمة بقدونس وشطة وثوم، وبيتزا الفراخ بيكون فيها صدور فراخ مشوية وزيتون وصوص طماطم.
CaiRoma
وفي وسط البلد وتحديدا شارع يوسف الجندي في باب اللوق هتلاقي كايروما والمنيو بتاعه فيه بيتزا وباستا وسندوتشات، ومن أنواع البيتزا المتاحة مارجريتا ونابوليتان وبولو وكواترو فروماجي وبيتزا فيجيتريان.
Pepenero
وفي ميدان الكوربة عندك بيبنيرو وهو مطعم إيطالي شامل، وفيه ركن ألعاب للأطفال علشان تاكل براحتك، وعنده أطباق إيطالي كتير مميزة مش بس البيتزا، ومن أنواع البيتزا اللي هتلاقيها نابولي وبوراتا ودون ليفيو وبيل إيطاليا.
Pane Vino
باني فينو مكانه جوه فندق سميراميس على الكورنيش، والمنيو بتاعه فيه بيتزا وباستا وأكلات إيطالي تانية، ومن أنواع البيتزا الموجودة كابريكوزا ودي مكوناتها طماطم وجبنة موتزاريلا، ومشروم، وسلامي، وزتون أسود، وفلفل مشوي وريحان، وبيتزا باربكيو اللي مكوناتها طماطم و موتزاريلا، وفراخ مشوية وسلامي وتِركي مدخن وسجق وصلصة باربكيو.