مشاريع
غوص ومظلات وصيد…أفضل أنشطة بحرية في شرم الشيخ
شرم الشيخ واحدة من أجمل مدن العالم الساحلية وبيميزها الشعاب المرجانية وتنوع البيئة البحرية، علشان كده مينفعش تروح شرم الشيخ من غير ما تبقى عارف إيه أهم الأنشطة البحرية اللي ممكن تستمتع بيها هناك.
الإبحار بالمظلة
الإبحار أو التزلج بالمظلمة Parasailing من أكتر الرياضات المائية اللي ممكن تمارسها في شرم الشيخ، ومش محتاج منك إنك تكون بتعرف تعوم أصلا، لأنك بتلبس لايف جاكيت.
المدة بتكون حوالي ساعة وفي كذا شركة في شرم ممكن تحجز معاها بسعر يبدأ من 430 جنيه للفرد شاملة الانتقالات.
سنوركلنج
شرم من أفضل أماكن العالم اللي ممكن تعمل فيها سنوركلنج، وده مش محتاج غير مهارات السباحة الأساسية والبسيطة، لأنك ممكن تلبس لايف جاكيت وبيكون في غطاس محترف مع المجموعة. ومن أفضل الأماكن في شرم للسنوركلنج جزيرة راس محمد، وده بيكون جزء من رحلة بحرية كاملة مدتها 4 ساعات شاملة الغدا ومشروبات بسعر يبدأ من 480 جنيه للفرد.
الغوص
هنا بيكون عندك فرصة أفضل إنك تتعرف على الحياة البحرية في البحر الأحمر من قريب، وفي حالة الغوص الليلي هتستمتع بمنظر الشعاب المرجانية بشكل أكبر. وطبعا الغوص محتاج مهارات وتدريب وده في شركات كتير بتوفره في شرم، ولكن التكلفة أكبر طبعا وبتبدأ من 2000 جنيه.
إيجار لانش
بحوالي 1800 جنيه ممكن تأجر لانش يساع لغاية 7 أفراد لمدة ساعتين وتنطلق براحتك في البحر وتصطاد أو تعمل سنوركلنج زي ما تحب.
رحلة بحرية لدهب
ممكن كمان تحجز رحلة بحرية ليوم كامل من شرم الشيخ للثقب الأزرق (Blue hole) في دهب، وتستمع بأكتر من نشاط منها الصيد والسنوركلنج وركوب الجمال وقوارب الكانيون. وتكلفة الرحلة دي بتكون حوالي 600 جنيه للفرد شاملة الوجبات.