أكل وشرب
عوض صليب٠٥ يوليو ٢٠١٩
This article is also available in   Switch Language

٤ أماكن بتعمل وافل زي ما الكتاب بيقول

لو رجعنا لأصل الوافل هنلاقي إن بلجيكا بتقول إنه ابتدى من عندها، والحقيقة الوافل على الطريقة البلجيكي هو أشهر وافل في العالم وبيكون مربعاته أكبر وعجينته هشة أكتر من الوافل الأمريكي، لكن التجارب الأولية لصناعة الوافل بدأت من العصور الوسطى على إيدين الإغريق.

أما في مصر فالوافل وصلنا متأخر بس بقى ليه محبين كتير، وأكيد عايزين يعرفوا أحسن أماكن بتعمله في العاصمة.



وافليشيوس



وافليشيوس Wafllicious عنده الوافل البلجيكي والأمريكي ووافل معمول مخصوص للأطفال على شكل ميكي. وبيقدمه حادق بحشوات مختلفة زي التركي المدخن ومكس الجبنة، وفي الحلو عنده اختراع اسمه كيك الوافل فيه منه كيت كات أو فراولة والنسخة المميزة مسميينها إيرث كويك، وكمن بيعملوا أيس كريم بنكهات مختلفة، وبيقدموا مشروبات سخنة وساقعة.


وافليشيوس له 8 فروع في القاهرة وفرعين في الإسماعيلية وكفر الشيخ.



وافل زون



وافل زون Waffle Zone بيشتغل في الوافل الحلو بس، والمميز عنده وافل الشيكولاته اللي بيعمله بأنواع الشيكولاته اللي ليها شعبية زي سنيكرز وإم آند إم ومالتيرز وتوبلرون.


وكمان عنده وافل بالأيس كريم فيه منه فانيليا ومانجو وفراولة وكراميل، وكمان بيعمل سلطة فواكة سادة أو بالأيس كريم ومشروبات ساقعة وسخنة.

وافل زون له فرعين واحد في التجمع الخامس والتاني في مدينة نصر.



دب ان دب



دب ان دب dipndip مصر عنده واحد من أكتر المنيوهات المسيلة للعاب في عالم الوافل في مصر، وبيتفنن في طريقة تقديمه هو والكريب الحلو، والمشهور عنده وافل dipndip وده بيجيلك متقطع 4 أجزاء معاه فاكهة الموسم وكريمة الفانيليا ونوع شيكولاته من اختيارك.

dipndip بيقدم كمان أنواع كتير من الحلو زي سيخ الفاكهة والشيكولاتة والبان كيك والبراونيز، وهو ليه 8 فروع في مصر منهم 6 في القاهرة واتنين في اسكندرية.



وافل ميكر



وافل ميكر Waffle Maker بيقدم الوافل الحادق والحلو، وفي منيو الحادق عنده برجر سجق وهوت دوج وفراخ كرسبي ومكس جبن وأصناف تانية، وفي منيو الحلو عنده وافل بالنوتيلا أو بالنوتيلا والأيس كريم، وتشكيلة من الوافل بالشيكولاتات المختلفة، وأعظم حاجة هي الوافل كيك وبتكون أربع طبقات وافل و عليها نوتيلا أو شيكولاته بيضاء أو كرامل و معاهم ٥ إضافات من اختيارك.

وافل ميكر له 7 فروع في القاهرة غير فروعه في بورسعيد وبورفؤاد والزقازيق.

مقالات ذات صلة