مشاريع
عوض صليب

فنادق في اسكندرية أقل من ٣٠٠ جنيه

اسكندرية واحدة من أجمل مدن مصر في الصيف والشتا، وناس كتير من أهل القاهرة بتفضل إنها تروح اسكندرية في الشتا بالذات أو أجازة نهاية الأسبوع خصوصا إنها مش بتكون زحمة زي الصيف.

واسكندرية فيها فنادق كتير جدا من أول الخمس نجوم لغاية النص نجمة أو من غير تصنيف، وهنا بندلك على أحسن فنادق اقتصادية في حدود 300 في الليلة للغرفة الفردية.

آمون


فندق آمون 3 نجوم في منطقة المنشية، وعلى بعد ربع ساعة مشي من ميدان سعد زغلول في وسط البلد.


ميزة آمون إن الغرف والحمامات نضيفة جدا وفيها تكييف وتليفزيون، وبوفيه الفطار معقول جدا هتلاقي فيه أنواع جبن مختلفة وفول وبيض، وكمان الاستاف بتاع الفندف متعاون وخدمة الغرف سريعة.



النصر



فندق النصر نجمتين وميزته الكبيرة إنه في محطة الرمل قريب من البحر، فمش هتحتاج تركب تاكسي أي مكان في وسط البلد، والفندق فيه إجمالا 30 غرفة بعضهم فيه حمامات خاصة والباقي حمامات مشتركة.


الفطار هناك لطيف والاستاف ودود وكل الغرف فيها تليفزيون وإنترنت واي فاي.



ترانزيت اسكندرية



على بعد 300 متر من محطة الرمل هتلاقي فندق ترانزيت الإسكندرية وهو فندق نجمتين، في واحدة من عمارات اسكندرية القديمة، والغرف متوفر ليها إنترنت واي فاي مجاني، لكن عيبها إن الميه بتقطع بعض الأوقات وأحيانا الأسانسير بيكون عطلان.



الاسكندر الأكبر


فندق الاسكندر الأكبر واحد من الموتيلات الاقتصادية في المنشية، وهو بعيد عن الكورنيش فده ممكن تعتبره عيب لأنك مش قريب من البحر أو ميزة لأنك بعيد عن دوشة الطريق.

الغرف مكيفة وفيها تليفزيون وإنترنت واي فاي مجاني، وهو من أقرب الفنادق لمكتبة اسكندرية ومطار اسكندرية.

رويال كراون

رويال كراون في سيدي جابر بيطل على الكورنيش، والغرف فيه مكيفة وفيها تلاجة صغيرة (مني بار) وتليفزيون وإنترنت، والفطار لطيف، وهو موتيل اقتصادي مناسب لميزانية صغيرة.