حاجات منحبها
ماركات محلية فى القاهرة بتعكس تراثنا
مع سرعة الحياة و الانفتاح بنخسر كتير من هويتنا و عادتنا و تقاليدنا, و حتى اشكالنا اتأثرت وبقينا شبه بعض ماشيين وراء الموضة حتى لو مش مناسبة. عشان كده لازم نقدّر اللي لسة محافظين على تراثنا و حضارتنا, و من الماركات المحلية اللي نجحت فى ده:
براند نجادا فى الاصل كان مشروع كندي لمساعدة صناعة الغزل و النسيج فى قرية نجادا فى الصعيد المصري, و من اوائل التسعينات لوقتنا الحالي و هم بيشجعوا الصناعات المصرية من صناعة ملابس و اكسسوار, لصناعة الفخار فى الفيوم. تصاميم نجادا يغلب عليه الطابع التراثي المصري و الشغل اليدوي المتقن, و قاعة العرض بتاعته فى الدقي شبيهة بمتحف ملابس, كل قطعة معروضة بتقول حكاية.
من كام سنة فاتت حصل طفرة فى صناعة الازياء فى مصر, و عدد كبير من المركات المحلية و مصممين الازياء دخلوا السوق بقلب جامد, و لكن مش كلهم قدروا يكملوا. من البراندز المحترمة اللي اثبتت وجودها و كملت – ذا صحرا كولكشن. تصاميم ذا صحرا كولكشن متنوعة و مستوحاه من الحضارة المصرية مع اضافة العنصر العملي المريح.
محلات تقفل و تفتح و الدنيا تقوم و تقعد و ميكس اند ماتش مكمل و ناجح و متطور, من اول ما فتح ابوابه سنة ١٩٨٥ و هو معتز بالصناعة و الخامة المصرية من مواد تصنيع و انسجة للأيد العاملة فى المصانع. ميكس اند ماتش عرف يخلق طرازه الخاص من الملابس اللي بتجمع بين الزي المصري التقليدي و حداثة التصاميم.
ق جاليرى بيشترك مع المركات اللي فوق فى الاعتزاز بكل ما هو محلي و لكن بيختلف فى تركيزه على الثقافة الحديثة بدل من التقليدية و منتجاته بتستهدف الشباب و بتعكس حياتهم من اقوال عربي مشهورة و تصاميم جرافيكس مطبوعة على تشيرتات و شنط و غيره.