أكل وشرب
أشهر ٥ عربيات فول في القاهرة هتحب تجربهم
الفول هو الأكلة اللي معروف بيها المصريين في أى حتى في العالم، عندنا الفول أسلوب حياة، وحاجة بتتربي عليها من انت في المدرسة وواخد معاك سندوتشات الفول، والسحور الأساسي في رمضان جنب الزبادي، ولأن الفول ضرورة لحياة الكائن المصري، هنعرفك على أشهر 5 عربيات فول في القاهرة هتحب تجربهم.
محروس
واحد من أشهر عربيات الفول في القاهرة، وغالبًا عربية الفول الوحيدة اللي ممكن تلاقي عليها أجانب بيكلوا جنبك بكل أريحية، شغالة 24 ساعة تقريبًا، وفي رمضان مش هتلاقي فيها مكان من الزحمة، موجودة في واحدة من أرقى أحياء القاهرة “جاردن سيتي”، والأسعار عنده حلوة والبيض المدحرج والبطاطس الشيبسي إدمان، اسأل عليه هو جنب حزب المؤتمر ومسرح السلام.
عبده دولار
صاحب نظرية “متكترش مع البياع كتير لميبعلكش” وديه بتضرب نظرية “الزبون ديمًا على حق”، ملناش دعوة بالنظريات خلينا في الأكل، الراجل ده بيعمل تحبيشة للفول محدش يعرف سرها لحد دلوقتي، بيقول أن وصلها بعد 20 سنة شغل في المجال، وديه خلته واحد من أشهر عربيات الفول في القاهرة واللي الناس بتجلها من كل حتة.
مكانه فى شارع سليم اللي في النعام اللي في عين شمس قبل خير زمان كده.. الطلب بالبيض والذي منه بيدخل في 10 جنيه.
سعد الحرامي
مين ميعرفش سعد الحرامي، لقبه الحرامي عشان سرق الفنان فريد شوقي وحش الشاشة وهو بيلعبه دومينو، الراجل معتز بالاسم وبيتبسط بيه لذكراه الحلوة، لكن هو ليه أشهر بتاع فول في مصر وخاصة منطقة وسط البلد، لأن سندوتشات الفول عنده حكاية ورواية هتاكل صوبعك وراها، روح شارع شامبيلون في وسط البلد وألف واحد يدلك عليه.
فول الجحش
لو أول مرة تسمع الاسم متستغربوش، ده علامة تجارية من علامات حى السيدة زينب، بدأ بعربية صغيرة وربنا فتحها عليه وبقى عنده محل مش بس كده، ده أشهر بتاع فول في مصر كلها مش القاهرة بس، مش لازم تستنى رمضان عشان تروح تجرب السحور عنده، شد انت وصحابك وروح أفطروا عنده في يوم، ومش هتبطل تروحله تاني، في السيدة زينب وفي أى حتة في مصر ألف مين يدلك على عنوانه في السيدة زينب.
حمادة شيرتون
هتلاقيه في حى مساكن شيرتون في القاهرة، أشهر من النار على العلم، في الأيام العادية مش بيبقى زحمة أوى بس لازم تستنى شوية عشان تاخد الطلب بتاعك انت رايح لحمادة، يعني أحلى طبق فول ممكن تدوقه في حياتك نواحي مصر الجديدة ومدينة نصر.. لو شغلك أو درستك قريب منه جرب تاكل من عنده هيبقى أساسي في يومك بعد كده.