أكل وشرب
عوض صليب٠٥ يونيو ٢٠١٩
This article is also available in   Switch Language

من فلسطين لمصر.. عشق الكنافة النابلسية له ناسه

من مدينة نابلس في فلسطين خرجت الكنافة النابلسية اللي هي واحدة من الاختراعات المميزة للحلويات الشرقية، علشان مختلفة عن المذاق اللي متعودين عليه اللي كله حلو في حلو، لكن علشان حد يحشي الكنفة جبنة فده أكيد اختراع، والحقيقة إنه اختراع ناجح جدا وده تقدر تعرف ده ببساطة من الطوابير اللي قصاد أي مكان كويس بيعمل كنافة نابلسية، واللي هنعرفك عليها هنا.



النجمة النابلسية



تقريبا مفيش حد في أكتوبر (المدينة مش الشهر!) ميعرفش حلويات النجمة النابلسية في الحصري، وهي منطقة أصلا كلها محلات أكل سوري، هيهكون مناسب جدا إنك تتغدى في مطعم سوري وبعدها تحلي من النجمة النابلسية.


المنيو بتاعه فيه الكنافة النابلسية الناعمة والخشنة التقليدية، مع أنواع تانية من الحلويات السورية والشرقية زي عش البلبل وعيش السرايا والمدلوقة وكمان بيقدم أيس كريم بنكهات كتير.



حبيبة الكويت


سهل إنك توصل لكنافة حبيبة الكويت لأن ليهم 5 فروع في الدقي والمهندسين والزمالك والعجوزة ومدينة نصر، ومش بس هتلاقي عنده كنافة نابلسية بأنواعها، لكن كمان مبرومة وعثمليّة وبقلاوة وبسبوسة وكل واشكر.



كنافة بيكري



مش بس السوريين المميزين بالكنافة النابلسية لكن كمان الأردنيين، وعندنا الدليل وهو كنافة بيكري المنتشر بسبع فروع في الشيخ زايد وشبرا والمعادي وزهراء المعادي ومصر الجديدة ومدينة نصر والعبور.


وبيكري عنده واحد من أكتر المنيوهات إغراء في عالم الكنافة والحلويات الشرقية، فهتلاقيه مدخل النوتيلا والبطاطا والعجوة والحبهان علشان يخرج بأصناف مختلفة، وكمان عنده أيس كريم ومشروبات سخنة وباردة.



غراند كنافة على الفحم



طول عمرنا في مصر متعودين على الفراخ والكفتة ع الفحم، حكاية الكنافة جديدة علينا لكن تستاهل التجربة عند غراند كنافة خصوصا لو كانت بالقشطة أو الشيكولاته.


غراند كنافة مكانه في شارع سوريا في المهندسين وهتلاقي كمان عنده حلويات شرقي مشكلة ومختلفة زي تاج الملك وبقج وسكاير وسكاكين.


النجمة السورية



مفيش حد في الهرم ميعرفش شارع العريش بزحمته ومحلاته، وهناك هتلاقي النجمة السورية وهو محل صغير لكن هتعرفه من الزحمة اللي عليه.


وغير الكنافة النابلسية اللي هي أصل شهرته في المنطقة بيعمل كمان هريسة وقطايف وبقلاوة وبسبوسة وتشيز كيك وأيس رول.

مقالات ذات صلة