مشاريع
بين النيل والسما.. أكتر أنشطة ممتعة في الأقصر
أكبر متحف مفتوح على وجه الكرة الأرضية هو الأقصر، اللي مش بس هتشدك معابدها وآثارها لكن كمان طيبة أهلها. وغير زيارة المعابد في البرين الشرقي والغربي ومقابر وادي الملوك ووادي الملكات، في أنشطة تانية مختلفة وممتعة من غيرها متكملش لذة رحلتك.
رحلة البالون
متعة الطيران في البالون (المنطاد) فوق الأقصر ومشاهدة شروق الشمس من أعلى نقطة ممكنة هو أكتر نشاط مثير ممكن تستمع بيه في الأقصر. الرحلة بتبدأ من الفجر وفي أكتر من شركة بتقدمها بأسعار مختلفة تبدأ من 500 جنيه للفرد، ومش محتاجة منك أي مهارات خاصة.
فلوكة في النيل
إيجار فلوكة في النيل بسعر بسيط جدا يبدأ من 100 ممكن يبقى نشاط لطيف جدا في الأقصر، وبيديك فرصة إنك تتفرج على كتير من المعالم الأثرية وانت في النيل، وكمان ممكن تستخدمها كوسيلة مواصلات تنقلك من البر الشرقي للغربي أو العكس.
الصوت والضوء
عروض الصوت والضوء بتنقلك آلاف السنين في الماضي وبتعيش قصص التاريخ الفروعني وبناء المعابد كأنك في عصرها، ومن بين العروض المتاحة في الأقصر عرض معبد الكرنك ومعبد فيلة، وأسعار التذاكر تبدأ من 65 للمصريين وتوصل لغاية 1000 جنيه للأجانب حسب العرض واللغة.
فسحة بالحنطور
ممكن تأجر حنطور تاخد بيه لفة لطيفة بين معابد البر الشرقي بسعر يبدأ من 75 جنيه، وسواقين الحنطور في الأقصر طيبين والتعامل معاهم لطيف وممكن يكونوا مرشدين ليك في الجولة ويعرفوك أفضل الأماكن اللي ممكن تروحها.
رحلة نيلية
الرحلات النيلية على البواخر السياحية Nile Cruises بين الأقصر وأسوان من أمتع الأنشطة اللي ممكن تقوم بيها، لأنك بتستمع بجمال النيل والمعابد مع شرح لمرشد سياحي، غير الحفلات اللي بتتعمل على متن الباخرة.
التكلفة بتختلف حسب عدد الليالي والدرجة السياحية للباخرة، وممكن تحجز غرفة مزدوجة في رحلة 3 ليالي بسعر أقل من 4000 جنيه.