مشاريع
١٠ أماكن على النيل لازم تجرب القعدة فيهم
القاهرة يعني النيل والليل والقعدة الحلوة وسط ناس بتحبهم، لو نفسك تروح تقعد على النيل ومحتار أو خايف تقعد في مكان ميطلعش على هواك، احنا هنسعدك ونقولك على 10 أماكن كلهم على النيل لازم تجرب القعدة فيهم، هتلاقي نفسك فصلت وروقت حالك وقضيت يوم جميل.
دلوقتي انت هتخرج وتاكل وتستمتع بفيو حلو على النيل مع أحلى شيشة عشان تظبط المزاج، كل ده عند حلاوة وزعتر، المكان رايق وتحفة خاصة وقت الغروب، والأكل والخدمة عندهم هايلة، كلمهم وأحجز قعدتك على النيل ليك انت وصحابك.
المكان ده عبارة عن مجموعة مراكب، بتختار منهم المركب اللي ماشية مع المود بتاعك، منهم مركب للمرتبطين، هتلاقيها رومانسية وهادية ومناسبة لكل هذا الحب في قلبك، المركب بتخدك في رحلة نيلية لمدة ساعتين، كلها حب وانبساط والأهم الخصوصية عشان مفيش حاجة تعكر قعدتك، المهم أن الحجز قبل معاد الرحلة ب24 ساعة، وهتلاقي أسعارهم في المعقول.
المكان ده من مُسببات الراحة النفسية لمعظم اللي جربه، هتلاقي نفسك في وش النيل، وشوف حكاويك انت والنيل هتوديك على فين، هتلاقي دفاية جنبك عشان لو الجو سقعة تستمع برضه بقعدتك على النيل وانت مدفي، وكمان الأكل عندهم هايل والأسعار في المعقول، وهتبقى خروجة حلوة أكتر لما تاخد صحابك وتقضوا يوم تفصلوا فيها من زحمة كل حاجة.
يُرشح هذا المكان بقوة في حالة المقابلات المهمة، وكمان مكان مميز كأول موعد غرامي، الهوا والمنظر على النيل تحفة، الغدا هناك جميل، ده غير أنه مكان مميز بقى لو عايز تتابع ماتش فريقك اللي بتحبه لأنه بيعرض كل الماتشات المهمة، ده غير أن هادي جدًا لو عايز تقرى أو تسمع مزيكا أو حتى تخلص شغلك.
الأكل اللبناني وصلك لحد عندك وانت على النيل، عندهم الأجواء كلها هتنقلك لبيروت، الفيو على النيل تحفه، ده غير الأكل حوار تاني عشان لو بدك تتروق، ده غير أن المكان بيقدم فقرات أغاني جميلة على العود، هتنقلك لعالم تاني، ده غير ديكور المكان التحفه والقعدة الشيك هتحس نفسك رحت عالم تاني، لو انت من الأكيلة اللي بتحب الأكل الشامي، وكمان من اللي بيعشقوا القعدة على النيل؛ فده مكانك.
ده مش مجرد كافيه، لأ ده مكان بيضم أكتر من كافيه ومطعم كلهم على النيل، هتلاقي العنوان في الصفحة وانت بتقلب، الكافيهات هناك عموما معظمها بيقدم خدمة كويسة، والتشيز كيك ببتعمل حكاية، وهناك كافيهات مشهورة بشيشتها الحكاية اللي هتمزج قعدتك، والمطاعم بتعمل أكل لذيذ جدًا ابقى اسأل على “طازج”، ده غير أن المكان بيعمل حفالات غنائية وعروض حلوة تانية، عشان تبقى قاعد في سلطنة وروقان من كل حاجة حواليك.
يعتبر من أشهر الأماكن اللي على النيل في محيط القاهرة، وده لأن مكنهم مميز جدًا على النيل ومش هتلاقي زيه، غير أن الأكل هناك حكاية وطازة، حتى العصاير هناك فريش، كل حاجة بتتعملك هناك مخصوص وبمزاج، كمان فيه شيشة رايقة عشان مزاجك الرايق، خد صحابك وحبايبك عشان تقضوا هناك يوم تفصلوا فيه من زحمة كل حاجة.
لازم تجرب المكان ده، دماغ في حتى تانية خالص، قعدة على النيل والإضائة هادية حتى الديكور هادي، تبدأ المزيكا تسحبك لحته تانية خالص، عندهم فقرات لمزيكاتية بتعزف لايف، المكان ده كلاسيك وشيك ورمانسي جدًا، مناسب لـ First Date ، كمان لو حابب تاخد صحابك لمكان رايق تتفرجوا فيه على الماتش، ده المكان المناسب، لازم تجرب القعدة هناك.
المطعم ده فيه كل حاجة انت عايزها، خلينا نبدأ وأقولك أنك تقدر من خلاله تحجز يخت خاص يخدك رحلة في النيل، المكان ده بيضم أربع مطاعم، احنا هنرشحلك منهم مطعم Sky Lounge المطعم ده أفضلهم وفيه قعدة برة كده منك للنيل، المكان ده حلو للصحابة وكمان للمرتبطين، بيقدموا عشاء رومانسي مخصوص، عشان يبقى يوم ميتنسيش، كمان هتلاقي فقرات وأغاني رايقة، ده غير الأكل حكاية تانية لوحدها لازم تجربها.
مينفعش نكون بنتكلم عن الأماكن اللي على النيل من غير ما نفكرك أنك لازم تروح برج القاهرة، هو مش مجرد رمز للقاهرة لكن ده مكان حلو جدًا لو حابب تخرج وتبقى بتبص على النيل والقاهرة كلها، هتلاقي في الدور 24 مطعم بيدور حوالين نفسه تروح تتعشي فيه انت وصحابك أو عيلتك، لو بتعدي من قدامه كل يوم نفسك تطلعه، ادينا بنفكرك أنك لازم تجربه تاني.