٣ أماكن هيستمتع الأطفال بالفسحة فيها في القاهرة

أوقات كتير لو انت معاك أطفالك أو حتي قرايبك الأطفال برضه بتكونوا محتارين تفسحوهم فين, لان مش كل الأماكن ممكن تكون مناسبة ليهم خصوصا لو فيها معلومات كتير زي المتحف وكده وهما لسه صغيريين..

في عائلات كتير بتستسهل وتأخد أطفالها معهم في المطاعم والكافيهات..

مع أن في مصر في اماكن كتير حلوة ممكن الأطفال يقضوا فيها وقت جميل وممتع مع أطفال تانية شبهم ومن سنهم كمان..

النهارده معانا أجمل 3 أماكن ممكن الأطفال يقضوا فيها وقت جميل في القاهرة بعيد عن الزحمة.

كيدي ماكس – Kiddi Max- 6 October :

كيدي ماكس هي ملاهي ممتعة وعلي درجة عالية من الأمان لأن كل حاجة فيها مبطنة سواء في الأرضيات او الألعاب بالأضافة لمراعتهم لمعايير للنظافة لدرجة أن الأطفال ممكن يقلعوا الأحذية الخاص بيهم قبل دخلهم لمنطقة الألعاب..

الأعمار فيها بتبدأ من سنة ولحد 12 سنة.. وكل المطلوب من ولي الأمر انه بيشحن كارت خاص بالملاهي بأي مبلغ ولو حتي في فلوس زيادة في الكارت ممكن تلعب بيها في زيارتك اللي جاية للملاهي..

المكان مقسم لثلاثة أجزاء :

الجزء الأول : منطقة ألعاب, فيها مجموعة مختلفة من الألعاب زي حمام الكور، والمركب المتحرك، والحصان اللي بيدور، والبيانو وغيرها من الألعاب الممتعة

الجزء الثاني : هو منطقة الفيديو جيم للكبار وكمان في لعبة الطيارات

الجزء الثالث : هو منطقة الفيديو جيم للسن الأصغر أو للبيبيهات

العنوان : سيتي سكيب مول، المحور المركزي، ميدان الحرية – بجوار نجدة أكتوبر

كيدزانيا Kidzania :

هو من أول الأماكن اللي موجودة في مصر واللي بتقدم مش بس ترفيه للطفل كمان بيتعلم مهنة جديدة من أكتر من 80 مهنة ممكن يختار منها ويخوض تجربة في أنه يدخل في عالم الكبار المهنية ..كمان في كيدزانيا بيتم توفير عملة خاصة للأطفال وهي ” كيدزوس ” اللي ممكن من خلالها يقدر يشتري ويلعب ويكسب ويدخر كمان..

كيدزانيا متاحة للأطفال من سن سنتين ولحد 13 سنة

العنوان: شارع التسعين، داخل كايرو فستيفال سيتي مول – التجمع الخامس

الموقع للحجز وتفاصيل أكتر.

سكي مصر Skiegy :

بيعتبر أول منتجع داخلي للتزلج في أفريقيا بصفة عامة، هتعيش فيه تجربة مختلفة من نوعها زي التزحلق علي الجليد ومشاهدة عرض البطاريق ومقابلتهم كمان وغيرها من الأنشطة اللي أكيد هتستمتع بيها مع عائلتك..

ولأن راحة وسلامة الأطفال وأولياء الأمور مهمة فسكي مصر عملت قواعد مهم جدا انكوا تعرفوها قبل الزيارة واللي هتلاقوها بكل سهولة علي الموقع الخاصة بيهم..

السن المناسب للدخول ولعب الأطفال بيعتمد علي اللعبة والمكان..يعني نقدر نقول عموما أن الأعمار بتبدا من سن سنتين

الأنشطة الموجودة بالمكان : كورة الزورب – منطقة لعب الثلج – موكب البطاريق – مقابلة البطاريق – البوب سليد – التيوب زون – قطار البولار أكسبريس – السنو روكيت – تسلق الحائط – التزحلق علي الجليد – التزحلق علي المنحدر الجليدي – مدرسة التزحلق علشان لو تحب تكون في درس جماعي لتعلم التزحلق..بخلافي المقاهي والمحلات اللي بتوفرالك شراء معدات التزحلق والتزلج

العنوان : مول مصر – مدينة 6 أكتوبر

الموقع للحجز وتفاصيل أكتر.

الأماكن الترفيهية بتفرق جدا مع الأطفال لان مش بس بيلعب لأ ده بيفكر وبيستمتع مع أطفال في سنه..

ممكن كمان من كتر استمتاعه يبقي مش عايز يمشي أو يستني الفسحة اللي جاية عشان يكرر التجربة الحلوة اللي انبسط فيها..