٣ أنشطة رياضية هتغير مودك في القاهرة

لو بتفكر في رياضة مختلفة تمارسها في القاهرة غير الجري على أكل عيشك، أو لعب الكورة مع أصحابك، فاحنا بنقدملك 3 أماكن في القاهرة بتنظم إيفنتات مختلفة.

اجري مع كايرو رنرز

كايرو رنرز Cairo Runners هي أكتر جهة بتنظم إيفنتات جري في القاهرة، وكان آخرها مارثون البلد، وده الاشتراكات بتاعته كانت لصالح مستشفى سرطان الأطفال.

من الحاجات اللطيفة في إيفنتات كايرو رنرز إنها مناسبة لكل أفراد الأسرة، فمش لازم يكون معاك ميدالية أوليمبية أو تعرف تجري زي يوسين بولت علشان تشترك، لكن كفاية الإرادة، وكمان في إيفنتات للأسرة كلها والأطفال، وذوي الاحتياجات الخاصة.

اركب عجل أو كاياك

ركوب العجل من الرياضات المفيدة جدا لصحة القلب وكمان بتساعد على التخسيس والحفاظ على اللياقة، ولحسن الحظ عندنا أكتر من جهة بتنظم إيفنتات ركوب عجل في القاهرة، منها كايرو بايك Cairo Bike ودول بينظموا إيفنتات أغلبها زيارة مناطق سياحية بالعجل زي المعز والأهرامات، والإيفنت الجاي هيكون المقطم ودير سمعان يوم 5 أبريل.

وفي كمان جو بايك Go Bike اللي بدأوا نشاطهم من 2012 وهدفهم حسب ما مكتوب على صفحتهم هو حالة من المرح والمغامرة والتعارف بين كل الأعمار.

وكمان فور بايك 4Bike اللي قرروايجمعوا بين التبديل والتجديف فدخلوا الكاياك ضمن أنشطتهم.

اطلع هايكنج

الهايكنج مناسب جدًا للناس اللي محتاجة تفصل من الشغل وزحمة الحياة وروتينها لمدة يومين، أو اللي بيحب المشي لمسافات طويلة، بس بدل من المشي في شوارع زحمة رحلات الهايكنج بتكون في الصحاري أو بين الجبال، وكايرو هايكنج Cairo Hiking من الأماكن اللي بتنظم إيفنتات هايكنج لطيفة في أماكن كتير زي الصحرا البيضا ووادي الجِمال ودهب.